?unique=d68bd7a){kind=logo}
· GAIA AKTIBATU proiektua benetako enpresa-ingurune batean baliozkotutako metodologia batekin amaitu da. Metodologia horrek aukera ematen du enpresa teknologikoek etorkizunean beharko dituzten gaitasun estrategikoak aurrez identifikatzeko, besteak beste, adimen artifizialari, digitalizazioari edo belaunaldi-erreleboari lotutako erronkei aurre egiteko.
· Gipuzkoako Foru Aldundiaren Talentua Ernatu programaren esparruan garatutako GAIA AKTIBATU proiektuak talentuaren plangintza enpresen lehiakortasuna indartzeko tresna estrategiko bihurtzen du.
· ATE Informática enpresak metodologia baliozkotzeko enpresa pilotu gisa parte hartu du. Orain, metodologia beste enpresa-ingurune batzuetan kontrastatzen jarraituko da, euskal enpresa teknologiko gehiagotara zabaltzeko.
· “Talentuaren plangintza ezin da hutsik dauden lanpostuak betetzera mugatu. Enpresek aurrez jakin behar dute beren negozio-estrategiak zer gaitasun eskatuko dituen, eta garaiz erabaki behar dute gaitasun horiek nola garatu, erakarri edo osatu.”
Donostia, 2026ko uztailaren 28a.– Adimen artifizialak, digitalizazioak, negozio-eredu berrien agerpenak, belaunaldi-erreleboak eta zenbait profil profesional aurkitzeko gero eta zailtasun handiagoak enpresa teknologikoen talentu-beharrak eraldatzen ari dira. Testuinguru horretan, Clúster GAIA eta Mondragon Unibertsitateak, MIKen bidez, GAIA AKTIBATU proiektua garatu dute. Proiektu horri esker, erakundeek etorkizunean beharko dituzten gaitasunak, konpetentziak eta profil profesionalak aurrez identifikatu ahal izango dituzte, beren bilakaerari arrakastaz aurre egiteko.
Gipuzkoako Foru Aldundiaren Talentua Ernatu programaren barruan garatutako proiektuak metodologia praktiko bat baliozkotu du, enpresaren estrategia eta talentuaren plangintza lotzen dituena. Helburua da erakundeei garaiz laguntzea zein lanpostu eta gaitasun izango diren estrategikoak identifikatzen, erretiroak aurreikusten, karrera-planak aztertzen, etorkizuneko talentu-beharrak detektatzen eta horiei nola erantzun erabakitzen, barne-prestakuntzaren, kontratazio berrien edo lankidetza-formulen bidez.
Horretarako, GAIA Klusterrak ekosistema teknologikoaren eta bere enpresa elkartuen beharren inguruko ezagutza eskaini du; Mondragon Unibertsitatea-MIKek, berriz, metodologia diseinatu eta garatu du, ikerketa akademikoa, nazioarteko erreferentziazko metodologiak eta proiektuan bertan lortutako esperientzia uztartuz. Emaitza enpresa teknologikoen errealitatera bereziki egokitutako eredua da, eta etorkizunean beste enpresa-ingurune batzuetan kontrastatzen jarraitzeko diseinatu da.
MIKen ustez, GAIA AKTIBATUren balio nagusietako bat da enpresei negozio-estrategia eta talentu-estrategia uztartzeko aukera ematen dien metodologia garatu izana: “Talentuaren plangintza ezin da hutsik dauden lanpostuak betetzera mugatu. Enpresek aurrez jakin behar dute beren negozio-estrategiak zer gaitasun eskatuko dituen, eta garaiz erabaki behar dute gaitasun horiek nola garatu, erakarri edo osatu. Talentua estrategiatik planifikatzen denean, benetako lehiakortasun-, berrikuntza- eta iraunkortasun-palanka bihurtzen da”, nabarmendu dute Mondragon Unibertsitatea-MIKetik.
Izan ere, beste ikuspegi batzuek ez bezala -behar diren pertsonen kopurua aurreikustera mugatzen direnak-, eredu honek ikuspegi konpetentzialean oinarritutako analisia txertatzen du. Horri esker, epe ertain eta luzera estrategikoak izango diren ezagutzak, trebetasunak eta gaitasunak identifika daitezke. Horrela, enpresek profil jakin batzuen eskasiari aurrea hartu, funtsezko konpetentzien garapena lehenetsi eta erabakiak denbora gehiagorekin hartu ahal izango dituzte.
Gainera, metodologia ez da tresna estandarizatu gisa planteatzen; Mondragon Unibertsitatea-MIKek gidatutako laguntza-prozesu espezializatu baten bidez aplikatzen da. Besteak beste, aurreikusitako erretiroak, talentuaren harrera-prozesuak (onboarding), karrera-planak, dauden konpetentziak eta etorkizuneko beharrak aztertuta, enpresa bakoitzak bere diagnostikoa eta bere errealitatera egokitutako ekintza-plana eskuratu ahal izango ditu, berehala edo epe ertainean ezar daitezkeen neurri zehatzekin.
Esperientzia pilotua ATE enpresan
Metodologia benetako ingurune batean kontrastatu da, GAIA Klusterreko enpresa elkartua den ATE Informática, S.A., enpresaren parte-hartzeari esker. Horrek aukera eman du haren aplikazio praktikoa baliozkotzeko eta etorkizunean beste enpresa teknologiko batzuetan ezartzeko ikasgaiak ateratzeko.
ATE Informática, S.A. euskal enpresa-talde baten parte da, eta enpresen eraldaketa digitalean, enpresa-kudeaketan, giza baliabideetan eta zerbitzu juridikoetan aholkularitza espezializatua eskaintzen du. 75 aholkularik osatutako taldearekin, 1.700 bezero baino gehiagori ematen die zerbitzua Donostian (2), Beasainen, Bilbon, Gasteizen eta Mexiko Hirian dituen bost egoitzetatik. Zehazki, ATE Informática, S.A. eraldaketa digitaleko aholkularitzan espezializatutako dibisioa da, ERP, app eta adimen artifizialeko soluzioek ematen dioten ezagutza, esperientzia eta gaitasuna baliatuz.
ATE Informática enpresaren ren kasuan, enpresak azaldu du lan horrek talentuaren kudeaketari buruzko ikuspegi estrategikoagoa eta epe luzerakoa garatzeko aukera eman diola, eta bere etorkizunerako erabakigarriak izango diren konpetentziak identifikatu dituela, hala nola adimen artifiziala, datuen gobernantza eta segurtasuna, berrikuntza, bezeroarekiko harremana, etengabeko ikaskuntza eta aldaketaren kudeaketa.
Esperientzia pilotuak, gainera, erakundearen indarguneak ez ezik, hobetu beharreko arloak ere agerian utzi ditu: “AKTIBATUk aukera eman digu egiaztatzeko talentua erakartzeko eta fidelizatzeko praktika asko jada gure erakundean bazeudela, baina modu naturalean garatzen genituela eta ez estrategia egituratu baten barruan. Orain ikuspegi zabalagoa eta epe luzekoa dugu, gure prozesuak sendotzen eta etengabe hobetzen lagunduko diguna”, adierazi dute enpresatik.
GAIA Klusterretik azaldu dutenez, ATE enpresarekin egindako esperientzia pilotutik harago, “GAIA AKTIBATUk metodologia hau beste enpresa teknologiko batzuetara zabaltzeko oinarriak ezartzen ditu. Laguntza espezializatu baten bidez aplikatzeko diseinatutako metodologiak enpresa bakoitzaren errealitatera egokitutako ekintza-plan batekin amaitzen du prozesua, talentu-beharrak aurreikusten eta analisi hori lehiakortasuna indartuko duten neurri zehatz bihurtzen lagunduz; gure sektorean gaur egun oso beharrezkoa den zerbait”, nabarmendu dute.
Proiektuaren sustatzaileen helburua metodologia hau beste enpresa-ingurune batzuetan kontrastatzen eta hobetzen jarraitzea da, euskal enpresa teknologiko gehiagok talentuaren plangintza estrategikoa beren garapenaren funtsezko elementu gisa txerta dezaten.//