?unique=d68bd7a){kind=logo}
Zallako enpresak bi urte baino gutxiagoko ibilbidea du, eta neurrira egindako software-ingeniaritzako zerbitzuak eskaintzen ditu, adimen artifizialaren integrazioarekin.
Minetechnology Zallan (Bizkaia) kokatuta dagoen start upa da eta neurrira egindako software-ingeniaritzako zerbitzuak eskaintzen ditu, adimen artifiziala integratuta. Gidari turistiko gisa jarduteko robot humanoidea sortzeko proiektua garatu du, eta, horrela, negozio-lerro berri batean sartu da.
Enpresa 2025eko otsailean sortu zuten Daniel Pérezek eta Iñigo Gómezek. “Adimen artifizialean espezializatutako informatika-ingeniariak gara”, azaldu du Daniel Pérezek. Enpresaren lehen egoitza Zallako etxebizitza batean kokatuta zegoen, eta azaroan gaur egungo kokalekura lekualdatu zen, Zallako elkartegira.
Minetechnologyk neurrira egindako software-ingeniaritzako zerbitzuak eskaintzen ditu, “eta adimen artifiziala negozioen egunerokotasunean integratzen du. Prestakuntza eta ziberjazarpenaren arriskuak aztertzeko ereduak sortzeko zerbitzuak ere eskaintzen ditugu”. Gainera, industria-ikusmen artifizialaren arloan ere hasi dira lanean, eta robot humanoide gisa lan egingo duen gidari turistikoa sortzeko proiektua garatu dute Nafarroako Polo Irisen. Polo Iris Nafarroako Foru Erkidegoko berrikuntza-ekosistemako 40 erakunde publiko eta pribatu garrantzitsuenek osatzen dute.
Horrela, robotika humanoidea negozio-lerro berri bihurtu da. Bezeroak hainbat sektoretatik datoz, ikus-entzunezkoen arloko start upetatik hasi eta industria-sektorera arte. Hain zuzen ere, azken sektore horretan “gehiago barneratu nahi” dutela diote.
Gaur egun, lantaldea bi bazkide sortzaileek osatzen dute eta hilabete honetan beste pertsona bat gehituko da. Lehen urteko fakturazioa 60.000 eurokoa izan zen, eta kopuru hori ia laukoiztu egin da dagoeneko. Aurten, 160.000 eurora iristea aurrez ikusten dute.
I+G jarduerak enpresaren jardueraren ia % 100 hartzen du. “Etengabe ari gara produktu berriak bilatzen eta beste player batzuekin batera I+G arloko proiektuetan parte hartzeko aukerak aztertzen”. Oraingoz, ez dute nazioartekotzeko estrategia zehatzik, “baina Italiako iparraldean proiektu batean parte hartzen ari gara, ustelkeriaren aurka borrokatzeko adimen artifizialeko plataforma bat garatzen. Gainera, beste proiektu batzuetan parte hartzeko aukera aztertzen ari gara; horietako bat da, adibidez, Horizon Proiektua Europar Batasuneko ikerkuntza- eta berrikuntza-programa, 2021-2027 aldirako ia 100.000 milioi euroko aurrekontua izan duena.
Epe laburrera begira, Europako esparruan proiektu gehiago eskaintzea da erronka. “Epe luzera, berriz, robotika humanoidearen arloan gehiago murgiltzea da gure helburua, egungo enpresaren bidez edo enpresa berria sortuta”.