?unique=8890000){kind=logo}
- Finlandia, Grezia, Italia eta Espainiako ordezkariak izango dira gaur eta bihar Bizkaian Europako QUANTUM+ proiektuan aurrera egiteko. GAIA klusterra da proiektuaren kideetako bat, eta helburu du teknologia kuantikoei buruzko ibilbide eta prestakuntza-plataforma bat garatzea goi-mailako hezkuntzako ikasleentzat, irakasleentzat eta enpresa teknologikoetako profesionalentzat..
- Bihar, apirilak 3, Lantik-en egoitza bisitatuko dute Biqain estrategia ezagutzeko. Bizkaiko Foru Aldundiak bultzatutako estrategia horrek teknologia kuantikoen arloko berrikuntzen garapena eta merkaturatzea bizkortzea du xede.
- Bestalde, Bilboko Ingeniaritza Eskolan (UPV/EHU) ere izango dira, unibertsitatearen eta industriaren arteko lankidetza sustatzen duen SoC4sensing Chip katedra hurbiletik ezagutzeko.
2025eko apirilak 2.- Vaasa unibertsitateko (Finlandia), Patraseko unibertsitateko (Grezia), Jesusen Bihotzaren Unibertsitate Katolikoko (Italia) eta Skills Divers Espainiako enpresako ordezkariak eta GAIA klusterreko (anfitrioia) kideak, Euskadin bilduko dira gaur eta bihar Europako QUANTUM+ proiektuan aurrera egiteko eta industria teknologiko kuantikoan lider izateko bidean aurrerapausoak emateko hemengo ekimen batzuk hurbiletik ezagutzeko.
Teknologia kuantikoak hurrengo hamarkadako teknologiarik disruptiboena izatea lortu nahi dute, eta horixe izan da, hain zuzen, bisitaren testuingurua. Gorabidean den teknologia horrek aplikazio ugari ditu sektore guztietan, hala nola energian, telekomunikazioetan, finantzetan, medikuntzan, mugikortasunean eta fabrikazio aurreratuan. Hala eta guztiz ere, gaur egun neurri handi batean ingurune akademiko eta ikerketako inguruneetara mugatutako eremua izaten jarraitzen du.
Bisita dela eta, Europako ordezkariek lan-jardunaldi trinkoa izan dute gaur GAIAren Bilboko egoitzan, EBko ERASMUS+ programak finantzatutako Quantum+ proiektuan aurrera egiteko.
Proiektua iaz hasi zen, eta 2027ko irailean amaituko da. Unibertsitateko eta enpresetako ordezkariak batzen dituen ekimen horren helburua da teknologia kuantikoei buruzko ibilbide bat eta prestakuntza plataforma bat garatzea ikasleen eta profesionalen trebetasunak eta enplegagarritasuna hobetzeko, teknologia kuantikoen arloko lan-indarraren eskaera gero eta handiagoa den testuinguru batean.
Bihar, osteguna, apirilak 3, nazioarteko ordezkaritza Lantiken Bilboko egoitzara joango da, Bizkaiko kuantika-estrategia ezagutzeko: Biqain, Bizkaia Quantum Advanced Industries. Ibilbide-orri bat da Bizkaiko lurraldean teknologia kuantikoko berrikuntzen garapena eta merkaturatzea bizkortzeko, teknologia- eta ikerketa-zentroen, unibertsitatearen, enpresa-ekimenaren eta Bizkaiko Foru Aldundiaren lankidetzaren bidez..
Ondoren, UPV/EHUren Bilboko Ingeniaritza Eskolara joango dira Chip SoC4sensing Katedra gertutik ezagutzeko. Katedrak unibertsitatearen eta industriaren arteko lankidetza sustatzen du, eta sistema elektronikoen arloan berrikuntza, garapen teknologikoa eta ezagutzaren transferentzia bultzatzen ditu.
GAIAk positibotzat jo du ordezkaritzaren bisita, eta honako hau azpimarratu du: “teknologia kuantikoaren arloan, teknologia hain emergente eta disruptiboa izanik, ezinbestekoa da unibertsitatearen eta enpresaren arteko lankidetza. Prest egon behar dugu, eta profesional gaituak izan behar ditugu, hazten ari den eta etorkizun handia duen eskaera bati erantzun ahal izateko. Nazioarteko bisita hau Quantum+ proiektuaren barruan kokatzen da, eta proiektu horrek lankidetzaren filosofia hori du oinarri. Zalantzarik gabe, bide horretatik aurrera egiten jarraitu behar dugu Euskadi industria kuantikoan erreferentziazko lurralde gisa kokatu nahi badugu”.//
