?unique=d68bd7a){kind=logo}
- GAIAren Batzar Orokorrak adierazi du burujabetza teknologikoa Euskadiren eta Europaren garapen ekonomiko eta industrialerako erronka nagusietako bat dela.
- Norabide horretan aurrera egiteko, GAIAk adimen artifizialean, teknologia kuantikoetan, mikroelektronikoan, zibersegurtasunean eta talentu digitalean dituen ekimenak indartuko ditu 2026an.
- Elena Zarraga GAIAko presidenteak defendatu du teknologia digital eta kuantikoko industria europarraren garapena azkartu beharra dagoela, Europaren lehiakortasun eta autonomia estrategikorako funtsezko elementu direlako.
- Batzarrak Klusterraren Zuzendaritza Batzordea berritu du, eta Ruben Otero sartu da (Tecnalia Fundazioa), Zientzia, Teknologia eta Berrikuntzarako Euskal Sarearen ordezkari gisa.
Bilbo, 2026ko ekainaren 3a.- Euskadiko Ezagutza eta Teknologia Industrien Klusterrak (GAIA) Batzar Orokorra egin du gaur, Bilboko Iberdrola Dorrean, “Burujabetza Teknologiko Eraldatzailea” lelopean, eta, bertan, enpresa elkartuek sektorearen bilakaera, datozen urteetako erronka teknologiko nagusiak eta Klusterraren jarduera markatuko duten ildo estrategikoak aztertu dituzte.
Klusterrak 2025eko ekitaldiko jarduera datuak argitaratu ondoren egin da Batzarra, eta, jakinarazi dutenez, ekitaldian GAIAko 306 erakundeek 7.371 milioi euroko fakturazio bateratua lortu zuten (+%5), 27.332 enplegu sortu zituzten (+%4), I+Gan egindako inbertsioa 222 milioi eurora igo zuten (+%10), eta esportazioetan 3.080 milioi euro gainditu zituzten (+%4); horrenbestez, sektorea Euskadiko eraldaketa ekonomiko eta industrialerako motor nagusien artean finkatu da. Zifra horiek, jarduera, enplegu eta inbertsioari dagokienez, maximo historikoetan kokatzen dute euskal sektore digitala.
Elena Zarraga GAIAko presidenteak Euskadi eta Europaren gaitasun teknologiko propioak indartzearen garrantzia azpimarratu du bere hitzaldian, eraldaketa teknologiko, ekonomiko eta geopolitiko sakonek markatutako nazioarteko testuinguruan.
“Burujabetza teknologikoa funtsezkoa izango da Euskadiren eta Europaren etorkizun industrial eta ekonomikorako”, Zarragak azpimarratu duenez, eta autonomia teknologiko handiagorantz aurrera egiteko beharra defendatu du, adimen artifizialean, azpiegitura digitaletan (hodeiko konputazioa, datu espazioak, konektibitatea, etab.), mikroelektronikan, zibersegurtasunean edo teknologia kuantikoetan gaitasun propioak garatuz.
GAIAko presidenteak nabarmendu du lurraldeen garapen ekonomiko eta industriala datuak, talentua eta teknologia ongizate kolektibo bihurtzeko duten gaitasunaren araberakoa izango dela gero eta gehiago, eta nabarmendu du balio kate berriak bultzatu behar direla, teknologia digitalari eta kuantikoari buruzko ezagutzan eta berrikuntzan oinarrituta.
Ildo horretan, azaldu duenez, Klusterrak lanean jarraituko du 2026an, industria “Digital + Kuantikoa” delakoa indartzeko, bere ekimenak lerrokatuz Europako etorkizuneko Industria Azelerazioko Legearekin eta euskal erakundeek sustatzen dituzten estrategiekin, industriari, burujabetza teknologikoari eta teknologia kuantikoari dagokienez; izan ere, arlo horretan lankidetza aktiboa dago Bizkaiko Foru Aldundiaren BIQAIN estrategiarekin, Red.es eta Trantsizio Digitalerako Ministerioarekin, eta Eusko Jaurlaritzaren BasQ estrategiarekin.
Jarduteko lehentasun nagusien artean, GAIAk arlo hauei lotutako ekimenak bultzatzen jarraituko du:
- Adimen artifizialeko aplikazio aurreratuak garatzea industriarentzat.
- Euskal ekosistema kuantikoa indartzea eta bertako enpresetan esperimentatzea.
- Mikroelektronikako gaitasunak garatzea.
- Euskadi zibersegurtasun eta teknodefentsaren erreferente gisa sendotzea.
- Talentu digital espezializatua erakartzea eta prestatzea; eta
- Enpresen hazkunde teknologikora bideratutako inbertsio formula berriak bultzatzea.
“Hori guztia, autonomia teknologikoa, nazioarteko lehiakortasuna eta Euskadiko teknologia digital eta kuantikoaren balioa sortzeko gaitasuna indartzeko”, adierazi du Klusterreko presidenteak.
Adimen artifizialak enpleguan duen inpaktuari dagokionez, Zarragak defendatu du “AA junior profilen ikaskuntzaren eta produktibitatearen azeleratzaile gisa erabili behar” dela, eta “ez profil horiek lan merkatuan ordezteko”, eta talentu gaztea txertatzeko eta prestatzeko espazioak babestearen alde egin du.
Ainara Basurko Bizkaiko Foru Aldundiko Sustapen Ekonomikorako diputatuak eman dio amaiera topaketari. Bere hitzaldian azpimarratu duenez, “erronka nagusia ez da bakarrik teknologia garatzea, baizik eta gure enpresa txiki eta ertainek, gure enpresa industrialek eta gure ekosistemak teknologia hori barneratu, eskalatu eta merkatu globaletan Bizkaitik hobeto lehiatu ahal izatea”. Horretarako, baieztatu duenez, “lankidetza publiko-pribatua, talentu espezializatua eta sektore teknologiko indartsua behar ditugu, gai izango direnak industriari dagoeneko abian den trantsizio digital, energetiko eta lehiakorrean laguntzeko”. .
Batzar Orokorrean, Pablo Oliete ekonomista eta 4.0 Industrian eta teknologia emergenteetan adituak ere parte hartu du, eta Europako Industria Azeleraziorako Plan berriak Europako lehiakortasun teknologikoa eta burujabetza digitala indartzeko planteatzen dituen aukerak aztertu ditu.