Donostia-San Sebastián, 2024ko irailaren 26a. Ikus-entzunezko Klusterren Espainiako Sareak (RedCAU) ezohiko batzarra egin du, eta Espainiako ikus-entzunezko sektoreko eta eduki digitalen sektoreko bederatzi elkarte nagusiak bildu dira. Topaketa Tabakaleran izan da, 2024ko Donostiako Nazioarteko Zinemaldiaren esparruan, eta Kataluniako Ikus-entzunezkoen Klusterrak dinamizatu du, bera baita gaur egun sarearen presidentea.

Batzarraren helburu nagusia ikus-entzunezko industriaren aurrerapenei buruz eztabaidatzea, urteko azken ekitaldiko emaitzak ebaluatzea eta datorren urterako lan plana zehaztea izan da. Era berean, erakundeak sektorearen funtsezko erronken aurrean duen jarrera estrategikoa eztabaidatu da, hala nola berrikuntza, digitalizazioa, elkarlaneko azpiegiturak sortzea, prestakuntza, politika arautzaileen azterketa eta nazioartekotzea.

Topaketan Kanariar Uharteetako (CLAC), Kataluniako, Galiziako (CLAG), Aragoiko (CLADA), Nafarroako (CLAVNA) eta Euskadiko (EIKEN)ikus-entzunezko klusterretako ordezkariek parte hartu dute, baita Madrilgo, Andaluziako (CLAND) eta Valentziako kluster berriek ere. Azken horiek sortzea mugarri bat da ikus-entzunezko industriaren barruan ordezkagarritasunaren eta lankidetzaren hedapenean, bai eskualde mailan, bai estatu mailan.

2021ean sortu zen RedCAU, eta Espainiako ikus-entzunezkoen industria indartzea du helburu, Espainiako eta nazioarteko enpresen eta erakundeen arteko lankidetza sustatuz. Honako helburu hauek ditu, besteak beste: ezagutzak eta jardunbide egokiak trukatzea erraztea, ikerketa, garapena eta berrikuntza bultzatzea (I+G+b), sektorearen balio-katean eraginkortasuna hobetzea eta herrialdera inbertsioak eta talentua erakartzea.

Topaketa funtsezko plataforma gisa nabarmentzen da, Espainiako ikus-entzunezko sektoreko eragile nagusiek industriak aurrez aurre dituen aldaketa teknologiko, sozioekonomiko eta kultural azkarrei erantzungo dien etorkizuna eraikitzen lagun dezaten.